नेपाल उद्योग वाणिज्य महासंघले नेपाल तथा विश्वः एक तथ्यांक नामक पुस्तकको सन् २००७ को संस्करण हालै प्रकाशमा ल्याएको छ ।

उक्त पुस्तकमा नेपाल सम्बन्धी आधारभूत जानकारीहरुका साथै उद्योग, वैदेशिक व्यापार एवं विदेशी विनिमय, वैदेशिक एवं संयुक्त लगानी, लगानीकर्ताको लागि आधारभूत जानकारी, कृषि, हवाई तथा सडक यातायात, विद्युत, पर्यटन, मुद्रा तथा वित्त, विनिमय दर, धितोपत्र बजार, मूल्य सूचकांकसंग सम्बन्धित तथ्यांकहरुका साथै दक्षिण एशियाली मुलुकहरु लगायत विश्व अर्थतन्त्रसंग सम्बन्धित महत्वपूर्ण तथ्यांकहरु समेत समावेश गरिएका छन् ।

त्यसैगरी सो पुस्तकमा राष्ट्रिय तथा औद्योगिक उत्पादन, औद्योगिक रोजगारी, वैदेशिक व्यापार, विदेशी विनिमय दर, पर्यटन आदिसंग सम्बन्धित ग्राफ चार्टमा समेत प्रस्तुतीकरण गरिनुका साथै आर्थिक क्षेत्रका केही सान्दर्भिक प्रकाशनहरुको संक्षिप्त विवरण समेत प्रस्तुत गरिएको छ ।

सो पुस्तक नेपालमा तथा नेपालसंग व्यवसाय गर्नेहरुका लागि तथा विदेशी लगानीकर्ता, नीति निर्माण, योजनाकार, अनुसन्धानकर्ता, अर्थविद् तथा विद्यार्थीहरुको लागि समेत उपयोगी एवं रुचिकर हुने विश्वास लिइएको छ ।

सो पुस्तकलाई CD-ROM Version मा पनि निकालिएको छ । सो पुस्तकको मूल्य रु. ४००। तथा CD-ROM को मूल्य रु. २५०। तोकिएको छ ।