नेपाल उद्योग वाणिज्य महासंघको महानिर्देशक पदमा मेघनाथ न्यौपाने नियुक्त हुनु भएको छ ।
महासंघका अध्यक्ष कुशकुमार जोशीको अध्यक्षतामा गत जेठ ३० गते पोखरामा बसेको महासंघको कार्यकारिणी समिति वैठकले उहांलाई उक्त पदमा नियुक्ति गर्ने निर्णय गरेको हो ।
श्री न्यौपाने यस अघि २०६३ सालमा कार्तिक १९ गतेदेखि महासंघमा का.मु. महानिर्देशक हुनु हुन्थ्यो ।
२०४६ सालमा सहसचिव पदबाट महासंघको सेवामा प्रवेश गर्नु भएका न्यौपानले का.मु. महानिर्देक हुनु अघि कार्यकारि निर्देशकको जिम्मेवारी समेत सम्हालि सक्नु भएको छ ।
महासंघ प्रवेश गर्नु अघि नेपाल चेम्बर अफ कमर्सको सचिवालय प्रमुख भई करिब एक दशक सेवा गर्नु भएका न्यौपानेले त्रिभुवन विश्वविद्यालयबाट स्नातकोत्तर गर्नु भएको छ र उहां उद्योग वाणिज्य लगायत आर्थिक क्षेत्रका साथै उद्योग वाणिज्य संघहरुको व्यवस्थापन (Chamber Management) मा दक्ष तथा श्रम सम्बन्धको ज्ञाता नै हुनु हुन्छ ।
साथै पत्रकारिता क्षेत्रका अनुभवि व्यक्तित्व न्यौपानेले पत्रकारितामा डिप्लोमा गरि विगतमा इन्द्रधनुष साप्ताहिकको प्रकाशन एवं सम्पादन समेत गर्नु भएको छ ।
