सप्तकोशी बाढी पिडीतहरुको सहयोगको लागि विभिन्न संघ/संस्थाहरुले नेपाल उद्योग वाणिज्य महासंघ मार्फत प्रभावित क्षेत्रमा वितरणका लागि महासंघका अध्यक्ष कुशकुमार जोशीलाई महासंघ सचिवालयमा आज आयोजित एक कार्यक्रम बीच नगद तथा राहत सामग्री हस्तान्तरण गरेका छन् ।
सो क्रममा नेपाल छाला जुत्ता तथा वस्तु उत्पादक संघका अध्यक्ष रामकृष्ण प्रशाईले संघका तर्फबाट रु. २५,०००/ (पच्चीस हजार) नगद र करिव रु. ३ लाख मुल्य वरावरको लत्ता कपडा, नेपाल मदिरा उत्पादक संघका अध्यक्ष केदारलाल श्रेष्ठले रु. १,११,१५१/- (एक लाख एघार हजार एक सय एकाउन्न) नगद र खिचापोखरी व्यापार संघ तथा खिचापोखरी यूथ क्लवका तर्फबाट संयुक्त रुपमा संघका महासचिव योगेन्द्र देवले रु ३१, ५००/- (एकतीस हजार पांच सय) नगद र रु. ३ लाख भन्दा बढीको जिन्सी सामग्री महासंघका अध्यक्ष जोशीलाई हस्तान्तरण गर्नुभयो ।
राहत हस्तान्तरण कार्यक्रमलाई सम्वोधन गर्नुहुंदै महासंघका अध्यक्ष जोशीले सप्तकोशी घटनाबाट सुनसरी जिल्लामा ठूलो मानवीय तथा भौतिक क्षतिपुग्न गएकोले विपत्तिको यस घडीमा सवैले आ-आफनो तर्फबाट सक्दो सहयोग गर्नुपर्ने आवश्यकता भएकोमा जोड दिंदै प्राप्त सहयोगको सराहना गर्नुको साथै यथाशीघ्र बाढी प्रभावित क्षेत्रमा राहत सामग्री वितरण गरिने विश्वास दिलाउनु भयो ।
महासंघका उपाध्यक्ष एवं नेउवामहासंघ-दैवि प्रकोप उद्धार कार्यदलका प्रवक्ता तथा मूल्याङ्कन टोलीका संयोजक भाष्करराज राजकर्णिकारले महासंघले राहत संकलन तथा वितरण प्रणालीलाई निकै प्रभावकारी रुपमा संचालन गरेको र बाढी प्रभावित क्षेत्रका महासंघका सदस्य उद्योग वाणिज्य संघहरुको समन्वयमा प्रभावित क्षेत्रमा क्याम्पनै संचालन गरि राहत वितरण कार्य भैरहेको जानकारी गराउंदै प्राप्त सहयोगले पिडीत जनताका लागि ठूलो राहत पुग्ने वताउनु भयो ।
महासंघको कार्यकारिणी समितिका सदस्य अंजन श्रेष्ठको पनि उपस्थिति रहेको सो अवसरमा राहत हस्तान्तरण गर्ने संस्थाका पदाधिकारीहरुले राहत सामग्री संकलन गरि सहयोग गर्न पाएकोमा खुशी व्यक्त गर्दै ती सामग्री बाढी प्रभावीत क्षेत्रमा यथाशक्य छिटो पुग्ने विश्वास प्रकट गर्नुभयो ।
