नेपाल उद्योग वाणिज्य महासंघ र सैनिक कमाण्ड तथा स्टाफ कलेज शिवपुरीका शिक्षार्थी सैनिक अधिकृतहरु बीच आज महासंघको सचिवालयमा उद्योग व्यवसायको विकासमा निजी क्षेत्रको भूमिका विषयक अन्तरक्रिया कार्यक्रम सम्पन्न भयो। नेपाली सेनाले प्रत्येक वर्ष सेनाको उच्च शिक्षा पुरा गरेका सैनिक शिक्षार्थीहरुको लागि निजी क्षेत्रको प्रतिनिधिमूलक संस्था महासंघसँग यस प्रकारको अन्तरक्रिया कार्यक्रम आयोजना गर्दै आएको छ।
सैनिक कमाण्ड तथा स्टाफ कलेजका प्रशिक्षार्थीहरुलाई सम्वोधन गर्नुहुंदै महासंघका अध्यक्ष कुशकुमार जोशीले शान्ति सुरक्षाको प्रश्न अहिले पनि उठीरहेको अवस्थामा नेपाली सेना जस्तो लामो इतिहास वोकेको संस्थाले शान्ति स्थापना गर्ने कार्यमा खेलेको भूमिकाको प्रशंसा गर्नु भयो। शान्ति सुरक्षाको अभावमा उद्योग व्यवसाय आजपनि निर्वाध रुपमा संचालन हुन नसकिरहेको यथार्थता राख्नुहुँदै सबै सुरक्षा निकायको समन्वयमा मुलुक भित्र शान्ति सुरक्षाको प्रत्याभुति दिलाई उद्योग व्यवसाय गर्ने वातावरण मिलाउनु पर्नेमा जोडदिनु भयो। अध्यक्ष जोशीले नेपाली सेनाका अधिकृतहरुलाई मुलुकको निर्माण, पूंजी परिचालन एवं रोजगारी प्रवर्द्धनमा निजी क्षेत्रको महत्व र भूमिकाका विषयमा जानकारी गराउन पाएकोमा खुशी प्रकट गर्नुभयो।
सो अवसरमा भएको अन्तरक्रियामा चर्को लोडसेडिङ तथा श्रम समस्याबाट उद्योग व्यवसाय ह्रासोन्मुख अवस्थामा पुगेको, हजारौ उद्योग व्यवसाय बन्द भएका र यसबाट वेरोजगारी बढ्दै गएको तर्फ चिन्ता व्यक्त गरिएको थियो।
सो अवसरमा महासंघका महानिर्देशक मेघनाथ न्यौपानेले सेना र निजी क्षेत्र बीचको यस प्रकारको अन्तरक्रियाबाट आपसी विश्वास र सम्बन्ध सुदृढ हुन जाने बताउनु भयो।
नेपालको आर्थिक वस्तुस्थिति एवं महासंघका गतिविधिसंग नजिकबाट जानकारी आदान प्रदान गर्न अनुकुल वनाउने यस प्रकारका कार्यक्रमबाट देशको विकास निर्माणका कार्यक्रममा अझ बढी सघाउन र अर्थतन्त्र लगायत उद्योग वाणिज्य क्षेत्र र राष्ट्रिय आर्थिक सामाजिक विकासमा यस क्षेत्रको योगदान सम्बन्धमा जानकारी हासिल गर्नुका साथै मुलुकको शान्ति सुरक्षाको निश्चितता मिलाउन समेत सेनाका अधिकृतहरुलाई अवसर मिल्ने बताउनु भयो। सो अवसरमा महानिर्देशक न्यौपानेले महासंघ र यसको भूमिका वारे विस्तृत प्रस्तुतीकरण गर्नु भएको थियो।
कार्यक्रममा महासंघको कृषि उद्यम केन्द्रका कार्यकारि निर्देशक डा. देवभक्त शाक्यले उद्योग व्यवसायको क्षेत्रमा निजी क्षेत्रको भूमिका वारे प्रस्तुतीकरण गर्नुहुंदै राजनीतिक अस्थिरता, विगतको द्वन्द, लोडसेडिङ, श्रम अस्थिरता, बन्द हड्ताल जस्ता गतिविधिले मुलुकको अर्थतन्त्रमा ठूलो ह्रास आएको र यसबाट उद्योग व्यवसाय क्षेत्र नराम्री पिडीत हुन पुगेको बताउनु भयो। साथै उहांले नेपालको वर्तमान अर्थतन्त्रको यथार्थ चित्र एवं आर्थिक विकासका लागि सरकार लगायत सरोकारवालाहरुले खेल्नु पर्ने भूमिकाका विषयमा स्पष्ट पार्नुभएको थियो।
सैनिक कलेजका वरिष्ठ अधिकृतहरुको समेत उपस्थिति रहेको सो अवसरमा सहायक रथी एवं सैनिक शिक्षाध्यक्ष नरेन्द्र रावलले वदलिंदो अवस्थामा सैनिक अधिकृतहरुलाई उद्योग व्यवसाय लगायत वहुपक्षिय विषयमा जानकारी दिन आवश्यक महशुस गरि कलेजले महासंघसंग यस प्रकारको कार्यक्रम आयोजना गर्दै आएको र कार्यक्रम उपलव्धीमुलक समेत भएको हुंदा भविष्यमा पनि यस प्रकारका कार्यक्रमलाई निरन्तरता दिइने बताउनु भयो।
कार्यक्रममा सैनिक अधिकृतहरुले नेपाली अर्थतन्त्र, उद्योग व्यवसायको विकासमा महासंघको भूमिका, राजश्व, वैकिङ, जलविद्युत, व्यवसायिक कृषि, पर्यटन, विश्व अर्थतन्त्रसंग नेपालको सम्बन्ध, सुरक्षा वल गठन, श्रम अवस्था लगायतका विषयमा जिज्ञासाहरु राखेका थिए।
