प्रधानमन्त्री पुष्पकमल दाहाल "प्रचण्ड" संग नेपाल उद्योग वाणिज्य महासंघका अध्यक्ष कुशकुमार जोशीको नेतृत्वमा गएको निजी क्षेत्रको प्रतिनिधिमण्डलले आज प्रधानमन्त्री तथा मन्त्रिपरिषद्को कार्यालयमा भेट गरी करको दायरामा आएको कुनै पनि क्षेत्रमा भएको लगानीलाई आयको स्वयं घोषणा (vdis) अन्तरगत श्रोत खोजिनु हुदैन भन्ने माग पुनः गरेको छ ।
अर्थ मन्त्री डा. बाबुराम भट्टर्राई समेतको उपस्थितिमा महासंघका अन्य पदाधिकारी एवं नेपाल उद्योग परिसंघ, नेपाल चेम्बर अफ कमर्श, होटल संघ (नेपाल), नेपाल समुद्रपार निकासी पैठारी संघ र नेपाल बैकर्स संघका पदाधिकारीहरु समेतको सहभागिता रहेको उक्त भेटघाटमा प्रतिनिधिमण्डलले देशको हरेक क्षेत्रमा लगानीको अवसर सृजना गर्न लगानीलाई प्रोत्साहन गर्नुपर्ने र त्यसको लागि सरकारले लगानी अनुकूलको कार्यक्रम (Package) ल्याई लगानीको परिभाषालाई समेत स्पष्ट पार्नुपर्ने माग गर्यो ।
उक्त अवसरमा अर्थ मन्त्री भट्टर्राईले लगानीको क्षेत्रलाई प्रोत्साहित गरी दुई अंकको आर्थिक वृद्धिदर हासिल गर्न तथा पूंजी पलायन हुन नदिनका लागि नै आयको स्वयं घोषणा कार्यक्रम ल्याएको र सरकारले रोजगारी सृजना गर्ने उत्पादनशिल लगानी तथा जलविद्युतको क्षेत्रमा भएको लगानीको श्रोत नखोज्ने सहमति सहित त्यस्तो लगानीकर्ताले करको दायरामा आउनु नपर्ने स्पष्ट पार्नु भयो ।
उक्त अवसरमा प्रधानमन्त्री प्रचण्डले देशको वर्तमान परिस्थिति आर्थिक विकास नभएको कारणबाटनै र्सृजना भएको स्पष्ट पार्नु हुदै देशमा लगानी बढाउन र उद्योग व्यवसायलाई राहत दिन सरकारले आगामी आर्थिक वर्षो बजेटमा प्राथमिकता प्राप्त क्षेत्रका उद्योगहरुमा गरिने लगानी बारे स्पष्ट व्यवस्था गरी विशेष कार्यक्रम एवं योजनाको घोषणा गर्ने तय गरेको समेत उल्लेख गर्नुभयो ।
