नेपाल र जनवादी गणतन्त्र चीनको यूनान प्रान्त बीचको आर्थिक तथा व्यवसायिक सम्वन्ध विस्तारको सम्भाव्यतालाई यथार्थतामा परिणत गर्न निजी क्षेत्रको तर्फबाट भएको प्रयासलाई तिब्रता दिनु पर्ने आवश्यकता नेपाली तथा चिनियां व्यवसायिक क्षेत्रबाट औल्याइएको छ ।

चीनको यूनान प्रान्तमा आगामी जुन ५ देखि ७ तारिखसम्म हुने चीन-दक्षिण एशिया व्यावसायिक मंचको चौथो बैठक (4th China-South Asia Business Forum), यूनानमै आयोजना हुने चाइना आयात निर्यात मेलाको सत्रौ संस्करण (17th Session of China Export & Import Fair) एवं दक्षिण एशियाली मुलुकहरुको दोश्रो वस्तु प्रदर्शनी (2nd South Asian Commodities Fair) मा नेपाली पक्षको सहभागिताका विषयमा छलफल गर्न नेपाल उद्योग वाणिज्य महासंघको निमन्त्रणमा अन्तराष्ट्रिय व्यापार प्रवर्द्धनका लागि चिनियाँ परिषद यूनान उप-परिषद (China Council for the Promotion of International Trade (CCPIT) Yunnan Sub-Council)का अध्यक्ष ली चियाशोउ (Li Jiasou) को नेतृत्वमा नेपाल आएको त्यहाँको यवसायिक प्रतिनिधिमण्डलसंग आज महासंघ सचिवालयमा भएको बैठकमा सो कुरा औल्याइएको हो ।

खासगरि दक्षिण एशियासंग मुख्य द्वारको रुपमा जोडन सकिने र दक्षिण तथा दक्षिण पूर्वी एशियासंग सिमाना जोडिएको पर्यटन, चिया तथा खनिज उद्योगमा सम्पन्न चीनको यूनान प्रान्त नेपालसंग सहकार्य गर्न तीव्र इच्छुक रहेको सो अवसरमा यूनानको प्रतिनिधिमण्डलले जोड दिएको छ ।

सो प्रतिनिधिमण्डलाई महासंघमा स्वागत गर्नुहुंदै महासंघका वरिष्ठ उपाध्यक्ष सुरज वैद्यले दुवै देश बीच आर्थिक तथा व्यवसायिक सम्वन्ध विस्तार तथा लगानी अभिवृद्धि गर्ने उद्देश्यले नेउवामहासंघ र सीसीपीआइटी बीच समझदारीपत्रमा हस्ताक्षर समेत भैसकेको स्मरण गर्नुहुंदै सो सहमती अनुसार व्यवसायिक प्रतिनिधिमण्डलको भ्रमण तथा व्यवसायिक सूचना आदान प्रदानमा समेत महत्वपूर्ण सहयोग मिलेको बताउनु भयो ।

सरकारी तहबाट मात्र नभै जनस्तरमा भएको सम्वन्ध विस्तारबाट पनि द्विपक्षीय आर्थिक तथा व्यापारिक सम्वन्ध बिस्तार एवं लगानी प्रवर्द्धनमा सफलता मिलेको बताउनु हुंदै वरिष्ठ उपाध्यक्ष वैद्यले नेपालको चीनसंग रहेको उच्च व्यापार घाटालाई कम गर्न नेपाली वस्तुलाई चिनियां बजारमा सहुलियत प्रवेश दिनु पर्नेमा जोड दिनु भयो । वरिष्ठ उपाध्यक्ष वैद्यले नेपालमा उत्पादित वस्तुहरुको चीन तथा भारतमा ठूलो वजार रहेकाले नेपालमा यूनान प्रान्तबाट जलश्रोत, कृषि उद्योग तथा पर्यटन लगायतका क्षेत्रमा लगानीका लागि आव्हान समेत गर्नुभयो । विदेशी लगानीको आकर्षाका लागि सबै प्रकारको सहयोग गर्न नेपाल सरकार प्रतिवद्ध रहेको जानकारी गराउ“दै निजी क्षेत्रको तर्फाट आवश्यक सहयोग पुर्‍याउन महासंघ निकै अग्रसर रहेको स्पष्ट पार्नुभयो । वरिष्ठ उपाध्यक्ष वैद्यले चीन-दक्षिण एशिया व्यवसायिक मंचलाई बढी प्रतिफलमुखी वनाउनु पर्ने सुझाव पनि सो अवसरमा राख्नु भएको थियो ।

नेपाल सरकारले केही क्षेत्र बाहेक अधिकांश क्षेत्रलाई शत प्रतिशत विदेशी लगानीका लागि खुला गरेको र करका दरहरु पनि दक्षिण एशियाका अन्य देशहरुको तुलनामा अत्यन्त कम रहेको जानकारी गराउनुहुंदै वरिष्ठ उपाध्यक्ष वैद्यले चिनीयां उद्यमीहरुले नेपालसंग मिलेर थुप्रै क्षेत्रमा सहकार्य गर्न सक्ने स्पष्ट पार्नु भयो । साथै उहांले चिनीयां कच्चा पदार्थमा आधारित रहेर नेपालमा संयुक्त लगानीमा निर्माण सामग्री, उपभोग्य वस्तुहरु र खाद्य वस्तुहरु उत्पादन गर्ने उद्योगहरु स्थापना गर्न सकेमा दुवै देशलाई फाइदा हुने संभावना पनि औल्याउनु भयो ।

सो अवसरमा प्रतिनिधिमण्डलका नेता ली चियाशोउ (Li Jiasou) ले भ्रमणको उद्देश्य माथि प्रकाश पार्दै सीसीपीआइटी र नेउवामहासंघ बीचको सहमती अनुसारका उद्देश्यहरु पुरा गर्न यूनान शाखाले पुरा सहयोग पुर्‍याउने बताउनु भयो । यूनान प्रान्त वाह्य देशहरुसंग आर्थिक तथा व्यापारिक सम्वन्ध विस्तार गरी सकेको जानकारी दिनुहुंदै उहांले यो भ्रमणवाट यूनान प्रान्त र नेपाल बीचको आर्थिक सम्वन्ध विस्तारमा थप उर्जा दिने विश्वास व्यक्त गर्नु भयो ।

सोही अवसरमा नेपाल उद्योग वाणिज्य महासंघ र अन्तराष्ट्रिय व्यापार प्रवर्द्धनका लागि चिनियाँ परिषद यूनान उपपरिषद (China Council for the Promotion of International Trade (CCPIT) - Yunnan Sub-Council) बीच आपसी आर्थिक सम्बन्ध विस्तार गर्ने उद्देश्यले एक सहमतीपत्रमा हस्ताक्षर समेत भएको छ । महासंघका तर्फबाट वरिष्ठ उपाध्यक्ष सुरज वैद्य तथा सीसीपीआइटी यूनानका अध्यक्ष ली चियाशोउले सहमतीपत्रमा हस्ताक्षर गर्नुभएको छ ।

सम्झौतापत्रमा नेपाल र चीनको यूनान प्रान्त बीच आर्थिक, व्यापारिक, वैज्ञानिक, प्रविधि सम्बन्धी सहयोग प्रवर्द्धन गर्ने, व्यवसायिक सम्बन्ध विस्तारमा प्रभावकारी भूमिका निर्वाह गर्ने, उद्योग व्यापार व्यवसाय लगायत आर्थिक क्षेत्रसंग सम्बन्धित सबै प्रकारका सूचना तथा जानकारी एवं सम्बन्धित देशको व्यापार, लगानी सम्बन्धी नीति तथा कानूनको आदान प्रदान, सभा सम्मेलन, गोष्ठी, बैठक, अध्ययन भ्रमण, व्यापारिक भ्रमणको आदान प्रदान तथा आवश्यकताका आधारमा तालीम संचालन एवं एक अर्का देशमा व्यापार मेला महोत्सवको आयोजना मार्फ व्यापार विस्तारमा भूमिका निर्वाह गर्ने उल्लेख गरिएको छ ।

त्यसैगरि व्यापार तथा लगानीका सम्भव्य क्षेत्रहरुको सही पहिचान तथा सो सम्बन्धी सूचनाहरुको आदान प्रदानका अतिरिक्त दुवै देशको हीतका लागि एक अर्काले आवश्यक ठानेका अन्य व्यवसायिक गतिविधिहरु संयुक्त रुपमा संचालन गर्ने पनि सम्झौतापत्रमा उल्लेख गरिएको छ ।