स्थानीय जनतालाई आर्थिक क्रियाकलापको मूलधारमा समावेश नगरेसम्म उनीहरुको जीवनस्तर उकास्न नसकिने हुंदा दातृ निकायहरुलाई निजी क्षेत्रसंग अधिकतम सहकार्य गर्न नेपाल उद्योग वाणिज्य महासंघले नेदरल्याण्ड सहयोग नियोग (Netherlands Development Organisation - SNV) का पदाधिकारीहरुलाई सुझाव दिएको छ । स्थानीय जनतालाई अर्थतन्त्रको मूल प्रवाहमा ल्याउन विभिन्न कार्यक्रमहरु मार्फत महासंघ स्थानीय तहमा क्रियाशिल भैरहेको अवस्थामा यो सुझाव दिएको हो ।
महासंघका अध्यक्ष कुशकुमार जोशी, उपाध्यक्ष कृष्णप्रसाद ताम्राकार र एसएनभी - एशिया क्षेत्रीय निर्देशक एण्डी वीकेम्प (Andy Wehkamp - Regional Director, Asia) र अलर्ट भेन डीन हेम (Allert Van den Ham - Regional Director SNV, Asia Region) बीच आज महासंघ सचिवालयमा भएको भेटघाटमा महासंघका तर्फबाट सो सुझाव दिइएको हो ।
नेपालमा व्यावसायिक कृषि विकासमा महासंघको कृषि उद्यम केन्द्रले एसएनभी नेपालसंग मिलेर विभिन्न जिल्लाहरुमा कार्यक्रमहरु संचालन गर्दै आएको छ । सो भेटघाटमा महासंघका अध्यक्ष जोशीले नेपालको विकास प्रयासमा एसएनभीले पुर्याउंदै आएको सहयोगको सराहना गर्दै दीगो आर्थिक विकासका लागि ग्रामिण क्षेत्रमा आर्थिक क्रियाकलाप विस्तार गर्दै स्थानीय जनतालाई अर्थतन्त्रको मूल प्रवाहमा ल्याउनु पर्नेमा जोड दिनु भयो । महासंघले आफना विभिन्न कार्यक्रमहरु मार्फत स्थानीय जनताको शीप विकास, रोजगारी अभिवृद्धि, व्यावसायिक कृषि विकासका लागि कार्यक्रमहरु संचालन गर्दै आएको र कतिपय कार्यक्रममा एसएनभी जस्ता संस्थाहरुसंग सहकार्य गरि जान सकिने सम्भावना रहेको बताउनु भयो ।
स्थानीय तहमा वस्तु उत्पादन विकास गरि निश्चित मुल्य अभिवृद्धिका माध्यमबाट राष्ट्रिय अन्तराष्ट्रिय बजारसम्म पुर्याउन महासंघले आफ्ना सदस्य संघहरुको प्रत्यक्ष सहभागितामा "एक गाउँ एक उत्पादन" कार्यक्रम, यूवाहरुको शीप विकासका लागि "ट्रेड स्कूल" जस्ता कार्यक्रमहरु सफल संचालन गरिरहेको र निजी क्षेत्रको सहभागितामा संचालित अधिकांश कार्यक्रमहरु सफल समेत रहेकोले सहकार्यका लागि आग्रह समेत गर्नुभयो । कार्यक्रममा आधारित सहयोग भन्दा पनि महासंघ र एसएनभी जस्ता संस्था बीच निरन्तर सहकार्य र समन्वयको संयन्त्र निर्माण हुनु पर्नेमा जोड दिनु भयो ।
एसएनभी नेपालका देशीय निर्देशक ह्यान्स हेज्रा (Hans Heijdra - Country Director, SNV Nepal), महासंघका महानिर्देशक हेमन्त दवाडी र एसएनभी नेपालका पोर्टफोलियो कोअर्डिनेटर उज्जवलराज पोखरेलको पनि सहभागिता रहेको सो भेटघाटमा उपाध्यक्ष ताम्राकारले कृषिको व्यवसायीकरण तथा वाँसमा आधारित उद्यमशीलता विकासका लागि एसएनभी नेपालसंग मिलेर कार्यक्रम संचालन भएको र सो कार्यक्रम निकै प्रभावकारी भएकाले आगामी दिनमा थप नयाँ क्षेत्रहरुमा कार्यक्रम संचालन हुन आव्हान गर्नु भयो ।
सो अवसरमा एसएनभीका पदाधिकारीहरुले आफ्नो संस्था र नेपाली निजी क्षेत्र बीच हालसम्म भएको कार्यक्रम एव प्राप्त उपलव्धीका विषयमा जानकारी लिने उद्देश्यले आफूहरुको नेपाल भ्रमण भएको र छिट्टै पुनः भ्रमण गरि महासंघ र यसको मुलुकभर फिजिएर रहेको संजालका पदाधिकारीहरुसंग वसेर थप कार्यक्रमहरु तयगर्ने बताउनु भयो । साथै उहाँहरुले हालसम्म संचालन भएका कार्यक्रमहरुबाट प्राप्त उपलव्धी एवं महासंघको सक्रिय सहभागिताको प्रशंसा समेत गर्नुभयो ।
