नेपाल उद्योग वाणिज्य महासंघका अध्यक्ष कुशकुमार जोशीले पूर्ण बजेट नआउंदा उद्यमी व्यवसायीहरुमा अन्यौलता छाएको बताउनु भएको छ । लमजुङ उद्योग वाणिज्य संघको २४ औं वाषिर्क साधारण सभाको शनिवार लमजुङमा उद्घाटन गर्नुहुंदै अध्यक्ष जोशीले समयमा बजेट आउन नसक्दाको असर मुलुकले दीर्घकालसम्म भोग्नु पर्ने बताउनु भयो ।
सम्पूर्ण क्षेत्रनै बजेट समयमा नआउंदाको गम्भीर परिणाम भोग्दै छ, उद्योग व्यवसाय क्षेत्रमा त झन ठूलो असर पर्ने छ - अध्यक्ष जोशीले भन्नु भयो - बजेट नहुंदा उद्यमी व्यवसायीहरुमा अन्यौलता बढेको छ । निरन्तर ओरालो लागिरहेको मुलुकको अर्थतन्त्रलाई थप नोक्सानी हुन नदिन तत्काल पूर्ण बजेट ल्याउन सरकारसंग माग गर्नुभयो ।
डरलाग्दो अवस्थाबाट मुलुकलाई सकुशल उद्धार गर्न राजनीतिक दलहरुलाई आव्हान गर्दै उहांले पटकपटकको निर्वाचनबाट समेत प्रधानमन्त्री छान्न नसक्दा राष्ट्रिय अन्तराष्ट्रिय रुपमा राम्रो संदेश जान नसकेको बताउनु भयो । यो सबैभन्दा दूर्भाग्य हो । अव चुप लागेर नवस्न नेताहरुलाई आग्रह गर्दै राष्ट्रियहित र जनताको विश्वास जितेर काम गर्न आग्रह समेत गर्नुभयो । निर्धारित समयभित्र संविधान निर्माण गर्नुपर्ने ठूलो अभिभारा बोकेका राजनीतिक दलहरुबाट मूल कार्यमा भएको ढिलाई तथा सत्ता प्राप्तिका लागि भएको किचलोले राम्रो संदेश नदिएको भन्दै निर्धारित मितिमै संविधान निर्माण गरि मुलुकलाई सही दिशा दिन अध्यक्ष जोशीले आग्रह गर्नुभयो ।
अध्यक्ष जोशीले निजी क्षेत्र राष्ट्र निर्माणको संवाहक भएकाले विकासका लागि निजी क्षेत्रसंग साझेदारी गर्नुपर्नेमा जोड दिंदै उद्यमी व्यवसायीहरुलाई सामाजिक उत्तरदायित्व सहितको व्यवसाय गर्न आग्रह समेत गर्नुभयो ।
सो अवसरमा शुभ-कामना मन्तव्य दिंदै व्यवसायीहरुले शान्ति सुरक्षाको स्थायी व्यवस्था सहित निर्धारित समयमा संविधान निर्माण, वर्तमान राजनीतिक अन्यौलता तथा प्रधानमन्त्री निर्वाचन प्रक्रियालाई एउटा निष्कर्षमा पुर्याउन आग्रह गर्नुभएको थियो ।
सो अवसरमा संघका पूर्व अध्यक्ष स्व. रमेशकुमार पियालाई मरणोपरान्त सम्मान गरिएको थियो । त्यसैगरि संघका उत्कृष्ट कर्मचारी कुसुम श्रेष्ठलाई पनि सो अवसरमा सम्मान गरिएको थियो । साधारण सभामा संघका इकाईहरु भोटेओडार र उदीपुरलाई सचिवालय निर्माणका लागि रु. १/१ लाख आर्थिक सहयोगको घोषणा गरिएको थियो भने शुन्दरवजार इकाईलाई उत्कृष्ट इकाईको रुपमा सम्मान गरिएको थियो । कार्यक्रम संघका अध्यक्ष प्रमोदकुमार श्रेष्ठको सभापतित्वमा सम्पन्न भएको थियो ।
