नेपाल अष्ट्रेलिया दौत्य सम्बन्ध स्थापनाको पचासौं वर्षको अवसरमा नेपाल उद्योग वाणिज्य महासंघको पहलमा अष्ट्रेलियाको मेलवर्नमा नेपाल फेष्टिवल-२०१० सम्पन्न भयो । महासंघ, गैरआवासीय नेपाली संघ-अष्ट्रेलिया, नेपाली राजदुतावास अष्ट्रेलिया र नेपाली कन्सुलेट अफिस मेलवर्नको संयुक्त पहलमा मंसिर ३-४ गते आयोजित उक्त महोत्सवमा नेपाली कम्पनीहरुले भाग लिएका थिए ।

महोत्सवमा महासंघको मेला तथा प्रदर्शनी समितिका सभापति एजी शेर्पाको नेतृत्वमा ५ वटा कम्पनीहरुले हस्तकलाका सामग्री (गरगहना) पश्मिना, तयारी पोशाक, अर्गानिक कफी लगायतका उत्पादनहरुको प्रदर्शनी गरेका थिए । कार्यक्रममा महासंघको मेला समितिका सभापति शेर्पालाई सम्मान समेत गरिएको थियो भने सो अवसरमा नेपाली खाना महोत्सव एवं नेपाली कलाकारहरुबाट नेपाली सांस्कृतिक कार्यक्रम प्रस्तुत गरिएको थियो ।

महोत्सवको पहिलो दिन आयोजित औपचारिक समारोहलाई अष्ट्रेलियाका लागि नेपाली राजदुत योगेन्द्र ढकाल, भिक्टोरियन मल्टीकल्चरल कमिसन मेलवर्नका कमिसनार मेलवर्नका इलिनी वेरिडेड स्यामुल (Elleeni Bereded-Samuel, VMC Commissioner), मेलवर्न अष्ट्रेलियाका एनआरएन अध्यक्ष ध्रुव सुवेदी, एनआरएन भिक्टोरियाका वम योन्जन, भिक्टोरियाका लागि नेपाली वाणिज्यदुत चन्द्र योन्जन लगायतले नेपाल अष्ट्रेलिया बीचको दौत्य सम्बन्ध, आर्थिक तथा व्यापारिक सम्बन्धका विषयमा चर्चा गर्दै दुई देश बीचको व्यापार विस्तारमा नेपाली महोत्सव महत्वपूर्ण रहने विश्वास प्रकट गर्नुभयो ।