नेपाल उद्योग वाणिज्य महासंघका पदाधिकारी र काठमाडौंमा संचालित दशौं सार्क मेलामा सहभागी हुन आएका श्रीलंकाली व्यवसायीहरु बीच महासंघ सचिवालयमा द्विपक्षीय व्यापार, लगानी तथा पर्यटन प्रवर्द्धनका विषयमा विस्तृत छलफल भयो । छलफलको दौरानमा नेपाल र श्रीलंका बीच आर्थिक तथा व्यापारिक सम्बन्ध अभिवृद्धि गर्न दुई देशबीच सिधा हवाई सम्पर्क हुनु पर्ने कुरामा जोड दिइयो ।
महासंघका उपाध्यक्ष प्रदीपजंग पाण्डेको पनि सहभागिता रहेको सो छलफल कार्यक्रममा श्रीलंकाली व्यवसायिक प्रतिनिधिमण्डलको स्वागत गर्नु हुंदै महासंघका अध्यक्ष कुशकुमार जोशीले महासंघ र श्रीलंकाली निजी क्षेत्रबीच विगतमा भएका सहकार्यहरुको स्मरण गर्दै दुई देश बीचको आर्थिक तथा व्यापारिक सम्बन्धलाई अझ सुदृढ पार्नु पर्ने विचार व्यक्त गर्नु भयो ।
उहांले सार्क राष्ट्रका अन्य मुलुकहरुसंग नेपालको सिधा हवाई सम्पर्क रहेको बताउंदै नेपाल र श्रीलंका बीच पनि व्यापार र लगानी अभिवृद्धि गर्न सिधा हवाई सम्पर्क स्थापना हुनु पर्नेमा जोड दिनु भयो । अध्यक्ष जोशीले श्रीलंकाले साना तथा मझौला उद्योगहरुको विकास तथा प्रवर्द्धन र द्वन्द्ध एवं संक्रमणकालको समयमा समेत हासिल गरेको आर्थिक विकासको अनुभव नेपालका लागि पनि उपयोगी हुने बताउनु भयो ।
अध्यक्ष जोशीले नेपाल र श्रीलंकाली उद्यमी व्यवसायीहरु बीच बहुमूल्य पत्थर तथा रत्न प्रशोधन, पर्यटन प्रवर्द्धन, जडिबुटी प्रशोधन जस्ता क्षेत्रहरुमा सहकार्य हुन सक्ने प्रबल संभावना रहेको बताउदै श्रीलंकाली प्रतिनिधिमण्डललाई यस क्षेत्रमा लगानी गर्न आह्वान समेत गर्नु भयो ।
श्रीलंकाली प्रतिनिधिमण्डलको नेतृत्व गर्नु भएका नेपालका लागि श्रीलंकाली राजदूत खोसापाला हेवागे (Khosapala Hewage) ले नेपालसंगको आर्थिक तथा व्यवसायिक सम्बन्ध बढाउन श्रीलंकाली निजी क्षेत्र इच्छुक रहेको बताउदै दुई देशबीच सिधा हवाई सम्बन्ध स्थापना गर्न आफू तल्लिन रहेको र निकट भविष्यमा नै यस सम्बन्धमा सफलता मिल्ने विश्वास दिलाउनु भयो ।
राजदूत हेवागेले परापूर्वकालदेखि धर्म र संस्कृतिमा आधारित रहेको नेपाल र श्रीलंकाबीचको सम्बन्ध आर्थिक तथा व्यापारिक रुपमा अझ सुदृढ गर्नु पर्नेमा जोड दिदै पर्यटन प्रवर्द्धनको क्षेत्रमा सहकार्य गर्नु पर्ने धारणा राख्नु भयो ।
सो अवसरमा नेपाल र श्रीलंकाका पर्यटन, जडिबुटी, चिया, इलेक्ट्रोनिक क्षेत्रसंग सम्बन्धित व्यवसायीहरुबीच आपसी सम्बन्ध विस्तारका विषयमा समेत छलफल भएको थियो । सो छलफल कार्यक्रममा दुवै देशका व्यवसायीहरुको सहभागिता रहेको थियो ।
