नेपाल सरकार अर्थ मन्त्रालय, राजश्व प्रशासन तालिम केन्द्र सम्पत्ति शुद्धिकरण निवारण समन्वय समितिद्वारा नेपाल उद्योग वाणिज्य महासंघको सहयोगमा सम्पत्ति शुद्धिकरण निवारणका विषयमा हिजो महासंघ सचिवालयमा आयोजित अभिमुखीकरण कार्यक्रम सम्पन्न भयो ।
कार्यक्रममा अर्थमन्त्रालयका सहसचिव टंकमणि शर्माले सम्पत्ति शुद्धिकरण निवारणको सैद्धान्तिक अवधारणा र अन्तराष्ट्रिय मापदण्डहरु, नेपाल राष्ट्र बैंक वित्तिय सूचना इकाइका धर्मराज सापकोटाले सम्पत्ति शुद्धिकरण निवारण सम्बन्धमा वित्तिय जानकारी, इकाई र यसका गतिविधिहरु र राजश्व अनुसन्धान विभागका महानिर्देशक महेशप्रसाद दहालले सम्पत्ति शुद्धिकरण निवारण ऐन/नियमका प्रावधानहरु र विभागबाट भएका प्रयासहरुका विषयमा कार्यपत्र मार्फत विस्तृत जानकारी गराउनु भएको थियो ।
कार्यक्रममा सभापतिको आशनबाट अर्थमन्त्रालयका राजश्व सचिव कृष्णहरि वांस्कोटाले सहभागीहरुलाई प्रमाणपत्र वितरण गर्दै सम्पत्ति शुद्धिकरण निवारण गर्ने अर्थमन्त्रालयको अभियानमा निजी क्षेत्रका महासंघ जस्ता संस्थाहरुबाट पूर्ण सहयोग हुने विश्वास प्रकट गर्दै यस प्रकारको अभिमुखीकरण कार्यक्रमलाई विस्तार गर्दै लैजाने र सम्पत्ति शुद्धिकरणका सम्बन्धमा अन्तराष्ट्रिय प्रतिवद्धताहरुलाई छिट्टै अनुमोदन गर्ने तयारी भैरहेको जानकारी गराउनु भयो ।
नेपाल उद्योग वाणिज्य महासंघका अध्यक्ष कुशकुमार जोशीले सम्पत्ति शुद्धिकरण व्यवस्था लागु हुनु भन्दा पहिलेदेखिनै विधिको शासन, भ्रष्टाचारको नियन्त्रण, स्वच्छ र स्वस्थ व्यवसायको प्रवर्द्धन भएको भए आज मुलुक यस्तो अवस्थामा नपुग्ने बताउंदै यस्ता ऐनको व्यवस्था प्रभावकारी रुपमा कार्यान्वयन भएमा शान्ति सुरक्षा सुदृढ हुने तथा लगानी आर्कषण एवं अन्तराष्ट्रिय रुपमा नेपालको साख जोगाईराख्न सकिने विश्वास प्रकट गर्नुभयो । अध्यक्ष जोशीले आपराधिक कृयाकलाप नियन्त्रण गर्न समेत उपयोगी हुने यस्तो ऐनका प्रावधानहरु लागु गर्नुपर्ने कुरामा महासंघको दृढ समर्थन रहेको जनाउनु भयो । साथै अध्यक्ष जोशीले सरकारले लागू गर्ने ऐन कानून स्वच्छ र पारदर्शी बनाउन आग्रह गर्दै यसलाई तर्साउने धम्काउने औजारको रुपमा प्रयोग नगर्न पनि आग्रह गर्नुभयो ।
नेपाल चेम्वर अफ कमर्सका अध्यक्ष सुरेन्द्रवीर मालाकारले अर्काको दवाव र लहैलहैमा भन्दा पनि यस्ता ऐन कानूनका विषयमा जनमानसमा पर्याप्त प्रचार प्रसार गरेर मात्र लागू गर्न सुझाव दिनुभयो । त्यसअघि कार्यक्रमको प्रारम्भमा राजश्व प्रशासन तालीम केन्द्रका प्रमुख राजेन्द्र प्रसाद नेपालले कार्यक्रमको उद्देश्यमाथि प्रकाश पार्नु भएको थियो ।
सो कार्यक्रममा सहभागी उद्यमी व्यवसायीहरुले सम्पत्ति शुद्धिकरण निवारण ऐनमा बेनामी उजुरीको आधारमा कारवाही अगाडि बढाउंदा विना आधारमा निरअपराध व्यक्तिले समेत अनावश्यक झंन्झट व्यहोर्नुपर्ने भएकोले कम्तिमा पनि उजुरीकर्ताले पूर्ण विवरण खुलाउनु पर्ने, उजुरीकर्ताको नाम गोप्य राख्न सकिने व्यवस्था हुनु पर्ने, अनुसंन्धान गर्ने व्यक्तिलाई अत्यन्तै बढि अधिकार भएकाले अनुसंन्धान गर्ने व्यक्तिले बद्नियत ढंगले कारवाही अगाडि बढाएको देखिएमा कसुरदारलाई हुने सजायभन्दा दोब्बर सजाय हुने व्यवस्था हुनु पर्ने, राजश्व अनुसन्धान र सम्पत्ति शुद्धिकरण सम्बन्धि व्यवस्था फरक फरक देखिएकोले सम्पत्ति शुद्धिकरण सम्बन्धी छुट्टै विभागको स्थापना हुनु पर्ने, यस सम्बन्धमा छलफल अन्तरक्रिया एवं जनचेतनामुलक कार्यक्रम मुलुकभर चलाउनु पर्ने लगायतका सुझावहरु राख्नु भएको थियो ।
