नेपाल उद्योग वाणिज्य महासंघका कार्यवाहक अध्यक्ष भाष्करराज राजकर्णिकारको नेतृत्वमा महासंघका प्रतिनिधिमण्डलले आज सम्माननीय प्रधानमन्त्री झलनाथ खनालसंग शिष्टाचार भेटघाट तथा छलफल गर्यो । छलफलमा कार्यवाहक अध्यक्ष भाष्करराज राजकर्णिकारले औद्योगिक व्यवसायिक क्षेत्रमा देखा परेका प्रमुख मुद्दाहरु एवं समस्या समाधानकालागि हुनु पर्ने व्यवस्थाहरु सहित सुझाव प्रस्तुत गरियो । महासंघद्वारा प्रस्तुत सुझावमा मुख्य तया नीजि क्षेत्रको नेतृत्वदायी भूमिका भएको बजारमुखी, खुला र उदार अर्थतन्त्र नै मुलुकको आर्थिक नीतिको आधार हुनु पर्ने, सम्माननीय प्रधामन्त्रीज्यू समेतबाट रोजगारदाता र ट्रेड यूनियन वीच गत चैत्र १० गते भएको सम्झौतालाई ऐतिहासिक सम्झौता हो भन्ने धारणा व्यक्त भईसकेको सन्दर्भमा रोजगारदाता र ट्रेड यूनियनहरु बीच भएको सम्झौताको पूर्ण कार्यान्वयन हुने निर्णय सहित नेपाल सरकारबाट राजपत्रमा सूचना प्रकाशित हुनु पर्ने, मुलुकको समग्र आर्थिक क्षेत्रको सुधारका लागि अत्यावश्यक पूर्वाधार क्षेत्रमा यस बर्षको बजेट पूर्णत केन्द्रित हुनु पर्ने, बजेट निश्चित दिन फागुन ३० मा आउने संवैधानिक व्यवस्था हुनु पर्ने र आर्थिक वर्ष वैशाख चैत्रलाई मान्नु पर्ने आदि रहेका छन्
यसैगरी, सम्पत्ति शुद्धिकरण ऐन राजस्वसंग जोड्नु नहुने, राजस्व लगायतका विषयहरुमा सम्बन्धित ऐनहरुमै यथोचित कारवाही गर्न सक्ने व्यवस्था भएकोले सोही ऐन अनुसार कारवाही हुने व्यवस्था हुनु पर्ने, बैङ्कमा नगद जम्मा गर्दा श्रोत देखाउनु पर्ने झन्झटिलो व्यवस्थाको साटो आयआर्जन गैरकानूनी कृयाकलापबाट आर्जित होईन भनी नकारात्मक घोषणा गर्ने व्यवस्था हुनु पर्ने आदि रहेका छन् ।
महासंघद्वारा प्रस्तुत अन्य सुझावहरुमा ह्रासोन्मुख अवस्थामा रहेका औद्योगिक क्षेत्रमा सुधारको वातावरण तय गर्नु पर्ने, निर्यात प्रबद्र्धनको लागि गत वर्ष दिएको प्रोत्साहनको व्यवस्थालाई सरल तरिकाले कार्यान्वयनको व्यवस्था हुनु पर्ने, निर्यातउन्मुख उद्योगहरुलाई सहुलियत दरले ऋण उपलव्ध गराउने व्यवस्था हुनु पर्ने, अर्थतन्त्रको मेरुदण्डको रुपमा रहेको कृषि क्षेत्रलाई व्यवसायिकरण गर्ने वातावरण तय हुनु पर्ने, बन्द भएका उद्योगहरुलाई सञ्चालन गर्ने व्यवस्था हुनु पर्ने आदि रहेका छन् ।
उक्त अवसरमा पूर्व अध्यक्ष पद्म ज्योतिले आगामी बजेटले कर सरल एवं सुलभ तरिकाले असुल गर्ने गरी करका दायरा बढाउने तर्फ ध्यान दिनु पर्ने, अहिलेको ह्रासोन्मुख अवस्थामा रहेको औद्योगिक स्थितिलाई सुधार गर्ने तर्फ सबै राजनीतिक दलहरुसंग छलफल गरी अगाडि बढा्नु पर्ने सुझाव प्रस्तुत गर्नु भयो ।
यसैगरी पूर्व अध्यक्ष चण्डिराज ढकालले अहिलेको जल्दो बल्दो समस्या, श्रम विवाद, तरलताको अभाव एवं बैंकको व्याजदर आदि भएकोले यस बिषयमा समाधानको लागि सरकारले ध्यान दिनु पर्ने र औद्योगिक सुरक्षा बल गठन वारे यथाशीघ्र कार्यान्वयन हुनु पर्ने सुझाव प्रस्तुत गर्नु भयो ।
उक्त अवसरमा सम्माननीय प्रधानमन्त्रीले महासंघबाट प्रस्तुत सुझावहरु उद्योग व्यवसाय एवं अर्थतन्त्रको विकासको लागि अत्यन्त महत्वपूर्ण भएको र अहिलेको सन्दर्भमा उद्योगहरुको स्थितिमा सुधार ल्याउन अत्यन्त आवश्यक भएको, बैंक तथा वित्तिय क्षेत्रमा देखा परेका समस्याहरु वारे सरोकार सबैसंग छलफल गरी सामधान गर्नु पर्ने, तीन खम्बे आर्थिक नीति सम्बन्धमा सबैसंग छलफल गरी अघि बढ्ने प्रतिबद्धता व्यक्त गर्नु भयो ।
प्रतिनिधिमण्डलमा पूर्व अध्यक्षहरु पद्म ज्योति, चण्डिराज ढकाल, उपाध्यक्षद्वय भवानी राणा, पशुपति मुरारका एवं कार्यकारिणी समितिका सदस्यहरु सम्मिलित थिए ।
