नेपाल उद्योग वाणिज्य महासंघका उपाध्यक्ष पशुपति मुरारका सहित केही उद्यमी व्यवसायी माथि श्रृंखलावद्ध रुपमा भएको आक्रमणबाट निजी क्षेत्र असुरक्षित भएको महसुस गरी उद्यमी व्यवसायीहरुले सरकारसंग सुरक्षाको माग गरेका छन् । अज्ञात समूहबाट महासंघका उपाध्यक्ष मुरारका सवार गाडीमा वैशाख १० गते तोडफोड भएको थियो ।
नेपाल उद्योग वाणिज्य महासंघका अध्यक्ष सुरज वैद्यको नेतृत्वमा निजी क्षेत्रका २ सयभन्दा बढी उद्योगपति व्यवसायी सम्मिलित प्रतिनिधिमण्डलले वैशाख ११ गते मन्त्रिपरिषदका अध्यक्ष खिलराज रेग्मीसंग उहांको निवास वालुवाटारमा भेटगरी सुरक्षाको उचित प्रवन्धको माग सहित ज्ञापन पत्र बुझाएको छ ।
महासंघद्वारा वुझाइएको ज्ञापन पत्र यस प्रकार छ:
नेपाल उद्योग वाणिज्य महासंघका उपाध्यक्ष श्री पशुपति मुरारकालाई लक्षित गरी हिजोमात्र भएको आक्रमणबाट उहांको गाडी तोडफोड भएको छ । यस्तै केही समयदेखि उद्योगी, व्यवसायी र उद्योग प्रतिष्ठानमाथि श्रृंखलावद्धरुपमा अज्ञात समूहबाट हुंदै आएका आक्रमण एवं घटनाका सम्बन्धमा सम्माननीय अध्यक्षज्यूको गम्भीर ध्यानाकर्षण गराउंदछौं । अज्ञात समूहबाट भएको ढुंगा एवं ह्यामर प्रहारबाट महासंघका उपाध्यक्ष श्री मुरारकाको बा. ६ च ७८७८ नम्वरको गाडीको सिसा फुटी क्षति पुग्नुको साथै आक्रमणबाट गाडीमा रहेका ड्राइभरलाई समेत चोट लागेको छ । आक्रमणको प्रकृति हेर्दा मानवीय क्षति पुर्याउने नियतले नै आक्रमण भएको देखिन्छ । यसअघि पनि महासंघको पर्यटन तथा हवाई उड्डयन समितिका सभापति श्री बि.के. श्रेष्ठ चढेको गाडीमा चैत्र २ गते, २०६९ सालमा आक्रमण भएको थियो भने नेपाल बैंकर्स एसोसिएसनका अध्यक्ष श्री राजनसिंह भण्डारी माथि २०६९ पौष २० गते, भौतिक आक्रमण भएको स्मरण गराउंदछौं ।
त्यसैगरी बहुराष्ट्रिय कम्पनी एनसेल, नेपाल डेरिभेटिभ एक्सचेन्ज लि.(एन्डेक्स), एभरेष्ट डि कार्गो जस्ता प्रतिष्ठानहरुमाथि भएको आक्रमणतर्फ पनि सम्मानीय अध्यक्षज्यूको ध्यानाकृष्ट गराउन चाहान्छौं । यी त केही प्रतिनिधि उदाहरणहरु मात्र हुन यी बाहेक वाहिर नआएका उद्योगी व्यवसायी माथि भएका आक्रमणका श्रृंखला सुन्ने हो भने त अवस्था अझै भयावह हुंदै गएको प्रष्ट झल्कन्छ ।
यी श्रृंखलावद्ध हमलाहरुले नेपालमा उद्योग व्यवसाय गरेर बस्नेहरुको गम्भीर असुरक्षा भएको र उद्योगी व्यवसायीको मनोवल निकै गिर्न गएको महशुस हामीले गरेका छौं ।
यी सवै आक्रमणलाई हामीले सिंगो निजी क्षेत्रमाथिको आक्रमणको रुपमा लिएको छौं । बढ्दो दण्डहिनताका कारण विगत केही समयदेखि श्रृंखलावद्ध रुपमा भैरहेका यस प्रकारका आक्रमणको जतिनिन्दा र भत्सर्ना गरे पनि पुग्दैन र यस्ता आक्रमण कुनै पनि बहानामा क्षम्य हुन सक्दैनन् । दण्डहिनताको अन्त्य नगर्ने हो भने यस प्रकारका आक्रमणहरु अझै बढ्दै जाने र यसले मुलुकलाई अझ असुरक्षा र अनिश्चितता तर्फ धकेल्ने होकि भन्नेमा सम्माननीय अध्यक्षज्यूको ध्यानाकर्षण गराउन चाहान्छौं । यस्ता घटनाबाट अन्तर्राष्ट्रिय जगतमा नेपालका बारे कस्तो संदेश जान्छ यसतर्फ पनि गम्भीर भएर सोच्न हामी आग्रह गर्दछौ ।
यस्ता घटना हुंदा प्रहरीबाट घटनामा संलग्न दोषीलाई पक्डने तर्फ गम्भीर प्रयत्न हुनु पर्दछ भने दोषी माथि कडाभन्दा कारवाही हुनु जरुरी छ । तर घटनामा संलग्नहरुको खोजी तथा कानूनको कठघरामा ल्याई दोषीलाई आम जनताले देख्ने र महशुस गर्नेगरी हदैसम्मको कारवाही हुन नसक्दा घटनाप्रति सरकार संवेदनशील हुन नसकेको होकि भन्ने संका उत्पन्न भएको छ । र यसबाट हामी निजी क्षेत्र अझै चिन्तित भएका छौं । यसले नेपाल राष्ट्रनै भोली अपराधीहरुको चंगुलमा त फस्ने होइन भन्ने तर्फ पनि हामी निजी क्षेत्र अत्यन्त सजग भएका छौं । अत: यस्ता आपराधिक कार्यमा संलग्न व्यक्तिहरुलाई तत्काल खोजी गरी कानूनको कठघरामा ल्याई सख्त कारवाही गर्न सिंगो निजी क्षेत्रका तर्फबाट महासंघ नेपाल सरकार समक्ष गम्भीर आग्रह गर्दछ । साथै उद्योगी व्यवसायी एवं उद्योग प्रतिष्ठानको सुरक्षाको वातावरण वनाइदिन समेत सरकारसंग माग समेत गर्दछौं ।
ज्ञापन पत्र वुझ्दै मन्त्रिपरिषदका अध्यक्ष रेग्मीले उद्योगी व्यवसायी माथि भएका आक्रमणलाई सरकारले निकै गम्भीरता पूर्वक लिएको र निजी क्षेत्रलाई सुरक्षाको महसुस हुने वातावरण निर्माणका लागि एक दुई दिनभित्रै गृहमन्त्री, सुरक्षा निकायका प्रमुखहरु त्था निजी क्षेत्रको समेत सहभागिता बैठक बसी एउटा टुंगोमा पुग्ने विश्वास दिलाउनु भयो । यसका लागि गृहमन्त्री सुरक्षा निकायका प्रमुखहरु र निजी क्षेत्र समेत सम्मिलित उच्चस्तरीय कार्यदल समेत गठन गरी कार्य गर्न सकिने विश्वास दिलाउनु भएको थियो ।
